Të hënën në Këshillin e Ministrave të BE-së është diskutuar lidhur me shtetin Kosovës, ku duhet thënë se ka pasur disa surpriza.
Kështu, shtetet më të fuqishme të BE-së, Gjermania dhe Franca nuk janë nuk janë angazhuar të flasin për Ballkanin Perëndimor e Kosovën.
Kryesisht, shtetet që kanë folur, kanë shprehur shqetësimin për planet e Prishtinës për të votuar të premten, shndërrimin e FSK-së në ushtri, duke përmendur mundësinë për tensione të reja.
Po ashtu, është përmendur edhe liberalizimi i vizave, ku burime nga kryeqyteti evropian i kanë thënë KTV-së se shtete si Kroacia, Lituania e madje edhe shteti mosnjohës, Greqia, kanë folur në favor të vendimit pozitiv për vizat.
Spanja, në diskutim, ka kërkuar zgjidhje për faktin që ajo nuk i njeh pasaportat e Kosovës, nëse dhe kur të ndodhë liberalizimi.
Por, kundërshtari kryesor dhe më i fuqishëm për liberalizimin, ka dalë Holanda, duke kërkuar më shumë kohë e punë deri në marrjen e vendimit.
Shefat e diplomacisë evropiane janë pajtuar që taksa 100 % e Kosovës ndaj Serbisë duhet të hiqet, sepse nuk i kontribuon dialogut ndërmjet palëve.
Por, ka pasur shtete që e kanë pranuar se Kosova ballafaqohet me vështirësi nga Serbia sa i përket aspektit të tregtisë.
