Sulmi ndaj policisë në Dropull të Gjirokastrës duket se ka qenë i planifikuar nga greku Kostandinos Kaçifas. Ky i fundit është një ekstremist i lindur në Shqipëri, por me bindje radikale. Ai e kishte planifikuar sulmin ndaj policisë shqiptare këtë 28 tetor.
Pikërisht sot, në ditën që në Bularat zhvillohet një festë e qytetarëve me origjinë greke, Kaçifas kishte parashikuar “t’i çonte një mesazh” siç shkruan ai Tsiprasit dhe Ramës.
Po të hedhësh një sy në profilin e tij në Facebook, ai ka plot mesazhe me thirrje ekstremistë. Ai apelon për rezistencë të grekëve në jug të Shqipërisë, të cilët i quan “vorio-epiriotë”.
Në njërin prej këtyre, të cilin e ka shkruar ditët e fundit Kaçifas shkruan:
“Rama dhe Tsipras bëjnë plane pa të zotët e shtëpisë. Për një gjë të jeni të sigurt. Rinia e Vorio Epirit nuk do të qëndrojë spektatore. Thirren të gjithë grekët e Vorio Epirit që në 28 Tetor të dërgojnë një mesazh në çdo anë. Grek ose vdekje!”
Ai është arratisur në thellësi të fshatit, ndërsa vijojnë kërkimet nga RENEA dhe helikopterë për kapjen e ekstremistit që sulmoi me armë policinë.
