Qyteti bregdetar i Sarandës është gati të çelë sezonin e ri turistik, me hapësira publike të plazhit të rikonstruktuara dhe tashmë falas për qytetarët dhe vizitorët. Ministri i Turizmit, Kulturës dhe Sportit, bashkë me kryetarin e bashkisë Olti Çaçi dhe deputetin e PS-së, Vasil Llajo vizituan nga afër investimet e reja që synojnë të rrisin cilësinë e shërbimeve dhe të forcojnë ekonominë lokale.
Gonxhja thekson se Saranda është gati për sezonin turistik, duke vënë në dukje se plazhet publike me shezlongë dhe çadra falas shërbejnë si rregullator i tregut, duke ulur çmimet dhe zgjeruar ofertën. Ai shtoi se situata e tensionuar në Lindjen e Mesme mund të sjellë një fluks të ri turistësh, si vendas ashtu edhe të huaj, që do të zgjedhin Shqipërinë si destinacion pushimesh. Ministri u ndal edhe te mundësitë për zhvillimin e ekonomisë blu, përfshirë lundrimin privat dhe ndërtimin e moleve turistike provizore.
Kryebashkiaku Çaçi shtoi se përgjatë rrugës për në Ksamil mund të ndërtohen pontile të vogla, duke lehtësuar aksesin në plazhe edhe nga deti. “Këto plazhe na bëjnë të kemi një destinacion sa më të lirë dhe konkurrues, duke ndikuar në uljen e çmimeve në të gjithë Sarandën”,-u shpreh ai. Me ujërat e kristalta, klimën mesdhetare dhe trashëgiminë historike, Saranda mirëpret çdo vit mijëra vizitorë vendas dhe të huaj.
