Vendi i dytë pas dy fazave të para nuk është kapërdirë mirë nga Kukësi. Ashtu siç e kishte paralajmëruar që gjatë muajit dhjetor të vitit të kaluar, presidenti i Kukësit, Safet Gjici ka prezantuar afrimin e dy futbollistëve më të rinj te skuadra verilindore.
Bëhet fjalë për dy futbollistë që vijnë nga Luftëtari i Gjirokastrës, sulmuesi Vasil Shkurtaj dhe fantazisti Eduart Rroca, të cilët sot kanë nënshkruar kontratën e tyre me Kukësin.
Të dy futbollistët kanë qenë protagonistë te skuadra gjirokastrite dhe tashmë janë gati të japin kontributin e tyre te Kukësi, për të rikthyer skuadrën verilindore te titulli kampion. Me firmën e sotme mbi kontratë, merr fund edhe telenovela Shkurtaj, pasi sulmuesi vlonjat kishte pasur oferta edhe nga skuadra si Teuta e Partizani.
Ndërkohë, dy lojtarët do t’i bashkohen skuadrës për të zhvilluar fazën përgatitore në Antalia të Turqisë. Mësohet se kartoni i mesfushorit i ka kushtuar Kukësit rreth 50 mijë euro, ku Rroca ka firmosur për klubin verilindor një kontratë 2.5-vjeçare me opsion rinovimi për një sezon tjetër. Ndërsa kartoni i Shkurtaj besohet se i ka kushtuar plot 70 mijë euro arkave të verilindorëve, me vlonjatin që ka firmosur për 2 vite në Kukës.
Të dy futbollistët do të udhëtojnë me skuadrën në Antalya, aty ku Kukësi do të kryejë fazën përgatitore të dimrit dhe do të luajë edhe dy ndeshje miqësore, përballë Basaksehirit dhe Rostovit.
