Në Gjykatën e Sarandës ka nisur të mërkurën seanca gjyqësore për rastin e vdekjes së 29-vjeçares britanike, Rebeca Gannon, e cila humbi jetën gjatë një ekspedite zhytjeje në bregdetin shqiptar.
Gjyqi është kërkuar nga babai i saj, George Gannon, i cili ndodhet në Shqipëri për të kërkuar drejtësi. Në një intervistë, ai deklaroi se është i vendosur të ndjekë procesin deri në fund.
“Vajza ime është vrarë. Në gjyqin e sotëm mungonin disa prova. Seanca e radhës do të jetë më 7 maj, kur prokuroria duhet të sjellë provat e nevojshme. Gjithashtu, nevojitet një ekspert për zhytjet profesionale. Nëse gjykata nuk e siguron, unë do ta sjell nga Anglia.”
George Gannon shprehu shqetësimin për zvarritjen e procesit gjyqësor, duke theksuar se nëse kjo ngjarje do të kishte ndodhur në Angli, do të ishte trajtuar brenda 2-3 muajsh, ndryshe nga Shqipëria, ku po zgjat për 3 vite.
“Saimir Kushova është përgjegjës për vrasjen e vajzës sime. Fajësoj edhe qeverinë, pasi nuk janë zbatuar rregulloret e nevojshme. Nëse do të ishin respektuar, kjo tragjedi nuk do të kishte ndodhur.”
Ngjarja ndodhi gjatë një ekspedite zhytjeje të organizuar nga “Spiranca Diving Center”, në pronësi të Saimir Kushovës, i cili ishte dënuar më parë me 15 vite burg në Norvegji për trafik droge. Në vitin 2022, Gjykata e Sarandës vendosi ta hetojë atë në gjendje të lirë kundrejt një garancie pasurore, pavarësisht se ai kishte punësuar në mënyrë të paligjshme instruktoren e zhytjes dhe nuk kishte siguruar kushtet teknike të nevojshme për ekspeditën.
