Lajme të mira vijnë për “Ballist” Morinën dhe për shqiptarët. Gjykatësi kroat Pero Miloglav, i cili mori vendimin për ekstradimin e Ismail Morinës në Beograd është shprehur se ky vendim ka shumë gjasa që të hidhet poshtë.
Gjykatësi e bëri lajmin të ditur në një intervistë për gazetën serbe “Vecernje Novosti”, teksa tha se vendimin mori në bazë të dokumenteve që kishte në tryezën e tij, por shtoi se tashmë çështja kalon në Gjykatën e Lartë të Zagrebit që do të japë edhe vendimin përfundimtar.
Miloglav tha se mundësitë që Gjykata e Lartë ta zhvlerësojë ekstradimin janë të mëdha.
Gjithsesi, edhe në rast se ky organ konfirmon dënimin, është ministri kroat i Drejtësisë, Drago Boshnjak ai që do të thotë fjalën e fundit nëse Morina duhet të ekstradohet.
Gjykata e Lartë serbe ka nisur një proces ndaj Ismail Morinës për çështjen e ngritjes së dronit në ndeshjen eliminatore Serbi-Shqipëri të tre viteve më parë dhe sipas mediave, ai rrezikon deri në tre vjet heqje lirie.
Megjithatë, duket se lobimi i autoriteteve mes Tiranës dhe Zagrebit mund ta lehtësojë pozitën e Morinës, teksa vendimi përfundimtar i takon ministrit të Drejtësisë së Kroacisë.
