Zëvendëskryeministri dhe ish-ministri i Transportit dhe Telekomunikacionit Fatmir Limaj është shpallur i pafajshëm për të gjitha pikat e aktakuzës në rastin e njohur si MTPT.
Limaj akuzohej për krim të organizuar, keqpërdorim të detyrës, marrje ryshfeti si dhe mos deklarim të parave të pranuara për fushatë.
Për pikën 1 të aktakuzës, lidhur me krimin e organizuar, katër të akuzuarit Fatmir Limaj, Nexhat Krasniqi, Endrit Shala, Shpëtim Telaku, janë liruar nga akuzat, pasi trupi gjykues ka vlerësuar se veprimet e tyre nuk përbëjnë vepër penale.
Për pikën 2 të aktakuzës “keqpërdorim të detyrës zyrtare”, katër të akuzuarit janë shpallur të pafajshëm, në mungesë të provave.
“Nuk është provuar se Fatmir Limaj, Endrit Shala, Nexhat Krasniqi kanë shpërdorur detyrën zyrtare për dhënien e tenderëve për kompaninë “Tali” dhe “Interevropa”, ka deklaruar gjykatësja Marie Tuma, me rastin e shpalljes së aktgjykimit.
Për pikën e 3, marrje e ryshfetit, gjithashtu Limaj dhe të tjerët janë shpallur të pafajshëm, pasi nuk është provuar se të akuzuarit kanë kryer këtë vepër penale.
“Nuk është provuar se ndërmjet vitit 2007 deri 2012, Fatmir Limaj, Nexhat Krasniqi dhe Endrit Shala kanë pranuar kërkesa për përfitime në favor të dhënies së tenderit”, ka deklaruar gjykatësja Marie Tuma, me rastin e shpalljes së aktgjykimit.
Pika e 4 e aktakuzës kundër Florim Zukës për dhënie të ryshfetit është refuzuar, pasi është parashkruar.
Edhe për pikën e 5, Florim Zuka gjithashtu, është liruar nga akuza për keqpërdorim të autorizimeve ekonomike.
Për pikën e 6, Fatmir Limaj për mos deklarim të parave të pranuara në fushatë, është liruar nga akuza, pasi që vepra është parashkruar, shkruan Express.
Aktakuza e parë ishte ngritur me datë 05 dhjetor 2012, ndërkaq aktakuza e dytë më 19 shkurt 2014 dhe për të dyja janë mbajtur dy shqyrtime fillestare. Mirëpo me vendimin e 30 majit 2014 të kryetares së atëhershme të trupit gjykues, këto dy raste janë bashkuar në një, duke ngritur një aktakuzë të cilën e kanë quajtur aktakuzë e konsoliduar.
