Dhomat e Specializuara të Kosovës në Hagë kanë refuzuar kërkesën e përbashkët të ekipeve mbrojtëse të Hashim Thaçit, Kadri Veselit, Rexhep Selimit dhe Jakup Krasniqit për apelimin e një vendimi që pranonte disa dokumente si prova në procesin gjyqësor kundër tyre.
Zëdhënësi i Dhomave të Specializuara, Michael Doyle, shpjegoi se dokumentet në fjalë – që përfshijnë akte të Shtabit të Përgjithshëm të UÇK-së dhe Qeverisë së Përkohshme të Kosovës – janë vlerësuar në mënyrë të detajuar nga trupi gjykues. Ai theksoi se janë marrë në konsideratë elementë si nënshkrimet, vulat dhe rrethanat e sekuestrimit, përfshirë faktin që disa prej tyre ishin konfiskuar nga shtëpia e Jakup Krasniqit.
Doyle hodhi poshtë pretendimet e mbrojtjes se Prokuroria kishte paraqitur dokumentet në mënyrë të papritur, duke sqaruar se mbrojtja ishte informuar që në fillim të gjykimit për synimin e Prokurorisë për të përfshirë këto materiale në listën e provave.
Thaçi, Veseli, Selimi dhe Krasniqi ndodhen në paraburgim në Hagë që nga nëntori i vitit 2020. Ata përballen me akuza për krime lufte dhe krime kundër njerëzimit, të dyshuara të jenë kryer gjatë luftës së Kosovës (1998–1999), përfshirë ndalime arbitrare, tortura, vrasje të paligjshme dhe ndjekje politike ndaj kundërshtarëve të dyshuara.
Të akuzuarit kanë mohuar fajësinë dhe e kanë cilësuar procesin si të motivuar politikisht. Procesi gjyqësor mbetet ndër më të rëndësishmit në kuadër të punës së Dhomave të Specializuara të Kosovës.
