Gjykata Penale e Maqedonisë gjatë ditës së sotme nuk ka marrë asnjë vendim për paditë e dorëzuara një ditë më parë nga Prokuroria Speciale për 94 persona mes të cilëve janë edhe funksionarë të lartë politikë.
Ndërkohë, Prokuroria Speciale Publike (PSP) bën me dije se akoma nuk ka dorëzuar në gjykatë padi për katër nga rastet e paralajmëruara një ditë më parë.
Në lidhje me ditën e sotme, prokurorja Katica Janeva është shprehur se gjykata do ta kryejë detyrën në mënyrë të paanshme dhe se do të bëjnë çmos që të jenë në seancë për të argumentuar të gjitha akuzat që i kanë ngritur.
Kujtojmë, se gjatë ditës së djeshme u qarkullua në opinionin publik por edhe në disa nga mediet kryesore të Maqedonise se Prokuroria e Posaçme do të kërkojë masa paraburgimi për tetëmbëdhjetë vetë, në mesin e të cilëve janë edhe ish-kryeministri Nikolla Gruevski, ish-drejtori i Shërbimit të Sigurimit, Sasho Mijallkov, ish-sekretarët e përgjithshëm të qeverisë Martin Protugjer dhe Kiril Bozhinovski, ish-ministrat e Transportit, Punëve të Brendshme dhe Kulturës, Mile Janakievski, Gordana Jankullovska dhe Elizabeta Kançevska Milevska.
Kjo masë është kërkuar edhe për ish-zëvendës kryeministrit Vlladimir Peshevski dhe disa figura të tjera të njohura për opinionin publik maqedonas.
