Kumanova duket se nuk po gjen paqe me qeverinë e Maqedonisë. Pas dënimeve të ashpra të Gjykatës së Shkupit për grupin “Kumanova” tani dhe gjykata e Kumanovës pas 15 viteve e drejtuar me kryetar nga radhët e gjykatësve shqiptar, tani do të udhëhiqet nga gjykatësja Snezhana Manev.
Ajo ishte e dyta e rankuar në listën e kandidatëve, ku ishin disa gjykatës shqiptarë. Në krye të gjykatës së Kumanovës nga viti 2008 ka qenë Behxhet Elezi, ndërsa para tij kanë qenë edhe tre gjykatës të tjerë shqiptarë.
Një garë interesante ishte edhe në Gjykatën e Tetovës, ku në mesin e shtatë kandidatëve fitoi Hasani Asani, i rankuar i katërti në listën e konkurrentëve. Në krye të listës ishte Betim Jahija, kandidati që preferohej nga shumica e këshillit, i cili ishte më i miri duke u rankuar i pari në listën e kandidatëve.
