Gjykata e Katanias ka lehtësuar masën për “financierin” e grupit të Habilajve, Nezar Seiti, nga “arrest me burg” në “arrest shtëpie”. Ka qenë avokati Detar Hysi, ai i cili ka përcjellë lajmin për lirimin e tij.
Nezar Seiti u arrestua në Babicë dhe mbahej në burgun 313. Ekstradimi drejt Italisë është kërkuar nga vetë Seiti, pasi nëpërmjet avokatit të tij, është shprehur se nuk beson tek drejtësia shqiptare. Më herët, gjatë dëshmisë së tij, ai ka thënë se me familjen Habilaj ka lidhje krushqie.
Përgjimet
Nga përgjimet e Prokurorisë së Katanias, Seiti ka pasur rolin e financierit të grupit Habilaj, dhe kujdesej për blerjen e gomoneve të shpejta. Gjithashtu sipas përgjimeve, Seiti bënte shpërndarjen e parave mes anëtarëve të bandës.
