Nesër në Hagë do të jepet vendimi për ish-liderin ushtarak serb të Bosnjës, Ratko Mlladiç, mbi të cilin rëndojnë 11 akuza, përfshirë ato për gjenocid, krime lufte dhe krime kundër njerëzimit gjatë luftës në Bosnjë.
Gjykata Penale Ndërkombëtare për ish-Jugosllavinë në Hagë do të japë vendimin e saj të shkallës së parë pas gjyqit 4-vjeçar të Mlladiç, i cili ishte një nga të arratisurit më të kërkuar në botë para se të kapej.
74-vjeçari akuzohet për gjenocid në Srebrenicë në vitin 1995, gjenocid në gjashtë komuna të tjera boshnjake në vitin 1992, përndjekje të boshnjakëve dhe kroatëve në të gjithë Bosnjën dhe Hercegovinën, terrorizim të popullsisë së Sarajevës me një fushatë bombardimi dhe sulmesh me snajper, si edhe pengmarrje të personelit të OKB-së.
Ndërkohë arrestimi i tij erdhi në 2011-n, pas një arratie prej më shumë se 15 vjet. Gjatë gjyqit të Ratko Mlladiç janë marrë në pyetje rreth 300 dëshmitarë, ndërsa Gjykata e Hagës ka pranuar 10 mijë prova.
Gjykata e Hagës do të japë një nga vendimet e saj më të pritura të mërkurën – atë kundër gjyqit të ish-komandantit serb të Bosnjës, Ratko Mlladiç.
Vendimi i Gjykatës së Hagës ditën e nesërme, është një ndër më të priturat dhe do të ndiqet nga një numër u madh viktimash të luftës, si dhe përfaqësues të entitetit serb të Bosnjës, Republika Srpska, ushtrinë e të cilit Mlladiç e komandonte gjatë konfliktit në fillim të viteve 1990.
“Si një e mbijetuar e traumës, mendoj se pavarësisht se cili është dënimi, ai do të jetë shumë i shkurtër dhe jo mjaftueshëm për të gjithë ata që ai ka lënduar,” tha Lejla Deljanin për Birn. Ajo është një banore e Sarajevës, e cila u plagos rëndë në kokë me një plumb snajperi në 1992-n, kur ishte vetëm 11 vjeçe.
Por djali i ish-komandantit serb të Bosnjës Darko Mlladiç është shprehur se babai i tij nuk ishte fajtor për krimet, për të cilat akuzohej. Për Birn ai ka shtua se “çdo vendim tjetër që nuk është lirimi i tij nga akuzat, do të jet13• i papritur për familjen e tij”.
Sipas Darko Mlladiç, të gjitha analizat ligjore tregojnë se Prokuroria e Hagës nuk e vërtetoi aktakuzën që akuzon babanë e tij. Ai gjithashtu këmbënguli se “nëse do të zbatohej ligji penal normal, gjenerali Mlladiç më 23 nëntor do të kthehej në shtëpinë e tij”.
Në lidhje me këtë çështje ka folur edhe avokati i 74-vjeçarit, Dragan Ivetiç, i cili tha se ish-gjenerali mund të mos marrë pjesë në dhënien e vendimit për të më 22 nëntor për shkak të gjendjes së dobët shëndetësore.
“Një doktor ka thënë se çdo lloj stresi, përfshirë një procedim gjyqësor, mund të rrisë shansin që Mlladiç të pësojë ndonjë infarkt, atak ose të vdesë,” tha Ivetiç, lajmëroi “Associated Press”.
Ndërkohë më herët gjatë këtij muaji, avokatët mbrojtës të Mlladiçit kërkuan nga Gjykata e Hagës shtyrjen e dhënies së vendimit të shkallës së parë deri kur të përcaktohej nëse ish-shefi ushtarak serb i Bosnjës ishte mendërisht dhe fizikisht i aftë të merrte pjesë në gjyqin e tij.
Kujtomë se në vitin 2011 kur Mlladiç u arrestua, ka pësuar tre infarkte. Si pasojë, në muajin mars të këtij viti, mbrojtja e tij kërkoi që ai të lirohej përkohësisht dhe të lejohej të shkonte në Rusi për trajtim mjekësor.
Avokatët pretendonin se trajtimi i tij mjekësor në qendrën e paraburgimit të gjykatës së OKB-së kishte qenë i papërshtatshëm.
Por gjykata e refuzoi një kërkesë të tillë, duke thënë se Mlladiç kishte marrë trajtimin e duhur mjekësor në Hagë.
