Ambasadori i Shqipërisë në Turqi, Genti Gazheli, e ka cilësuar si një arritje mësimdhënien e gjuhës shqipe si lëndë me zgjedhje në shkollat 8-vjeçare në Turqi. Në mesazhin drejtuar shqiptarëve me rastin e festave të fundvitit, Gazheli evidentoi të gjitha sfidat dhe arritjet gjatë vitit 2018. Sipas tij, viti që po lëmë pas është përmbushur nga ana e objektivave.
“2018-a po mbledh rrezet e fundit, dhe kjo ambasadë mendon se i ka përmbushur mësë miri sfidat që u shfaqën. Sfidat tona në të shumtën e rasteve ishin dhe janë kurorëzim suksesesh. Viti që po lëmë, për nga ana e realizimit të objektivave, mund të thuhet se ka shumë pika për tu vënë në pah”, tha Gazheli.
Numri i individëve apo i bizneseve që duan të vijnë në Turqi apo të shkojnë në Shqipëri, sipas ambasadorit, është gjithnjë në rritje. Ai i konsideroi si mjaft të përsosura marrëdhëniet mes dy vendeve.
“Natyrisht, marrëdhëniet strategjike me Turqinë janë të përsosura, dhe ne vazhdojmë të punojmë për cilësi të lartë në këtë aspekt. Gjithsesi, krahas këtyre marrëdhënieve të mira politike, fusha ekonomike mbetet përparësi, ku duhet punuar më tepër për këtë qëllim. Në këtë pikë, ndërhyrja e Turqisë është thelbësore”, tha Gazheli.
