Kukësi nuk ka arritur të marrë më shumë se një barazim 2-2, përballë Vllaznisë në “zeqir Ymeri”. Ata e panë vetën në disavantazhin e dy golave që në fillimin e ndeshjes dhe kjo bëri që të mos ishin komodë dhe të arrinin vetëm një barazim mjaft të vështirë. Më këtë barazim ata i largohen vendi të parë, Skënderbeut në -5 pikë. Ishte trajneri Gjoka që ndali ekipin e Kukësit në shtëpi, ai i njeh mjaft mirë lojtarët verilindorë, pasi një vit më parë ishte ai që ngriti titullin kampion me Kukësin. Ky barazim që kanë marrë shkodranët është mjaft pozitiv, pasi starti i kampionatit ishte mjaft i dobët dhe tani shpresa për të bërë mirë është rikthyer.
Tekniku serb që drejton kuksianet, Milinkovic është shprehur mjaft i zhgënjyer nga barazimi dhe është shprehur se ishin përgatitur për fitore. “E kishim vlerësuar maksimalisht Vllazninë dhe e kishim parashikuar mënyrën se si do të luanin. Mund të them se ishim përgatitur për fitore, por pësuam dy gola të shpejtë dhe kjo na i vështirësoi punën, sidomos nga ana morale. Nuk ishte çështje rreshtimi dhe as pozicionimi i lojtarëve në fushë. Mendoj se pësuam golat shumë shpejt dhe në të dy rastet për shkak të gabimeve personale të futbollistëve tanë. Të jesh 0-2 kaq herët, është shumë e vështirë të rikthehesh të luash dhe aq më tepër të përmbysësh rezultatin”, tha Milinkoviç.
Ernest Gjoka nga ana tjetër komplimenti lojtarët e tij dhe tha se mund ta kishin fituar ndeshjen nëse do të kishin guxuam shumë. Ai kërkoi mbështetje më të madhe nga tifozët, pasi me lojtarët që ka në dispozicion ai do tu kthehet shumë shpejt fitoreve. “Në pjesën e parë ishim shumë në ekuilibër taktik dhe arritëm të shënojmë dy herë. Edhe në pjesën e dytë luajtëm mjaft mirë dhe kërkuam të shënojmë golin që do të mbyllte ndeshjen, por nuk ia arritëm. Duhet të them se kemi elementët e duhur, mjaft të përmirësohemi nga ana psikologjike dhe mund të përballemi me cilindo kundërshtar. Në fakt i njoh mirë veçoritë e futbollistëve të Kukësit dhe i kisha porositur lojtarët e mi që të dinin t’i shfrytëzonin në fushë njohuritë e mia. Mendoj se mund të merrnim edhe 3 pikët, por duhet të guxonim pak më tepër. Unë me stafin tim premtojmë që do të bëjmë maksimumin, për të zhvilluar lojë të bukur dhe marrë rezultate, por për ta bërë këtë kemi nevojë për mbështetjen e tifozëve. Duam sa më shumë tifozë pranë nesh, që t’ia dalim bashkë”, tha Ernest Gjoka.
