Milani është forcuar ndjeshëm këtë merkato dhe një nga blerjet më të rëndësishme në mesfushë ishte ajo e francezit të Chelsea Tiemouè Bakayoko. 24 vjeçari gjatë prezantimit ka folur gjatë dhe është shprehur se përshtatja e tij në Serie A do të jetë më e lehtë pasi ka punuar me një trajner si Antonio Conte.
“Kam mësuar shumë nga Conte, mendoj se për mua është më e lehtë tani të përshtatem me kampionatin italian, jam shumë i lumtur që ndodhem këtu. A ka ngjashmëri mes Gattuso dhe Conte? Bëhet fjalë për persona të cilët i bëjnë gjërat me pasion. Jam i kënaqur me eksperiencën time në Premier League, ku kam luajtur si titullar në ndeshje të rëndësishme, njoha karakteristikat e një kampionat si ai anglez dhe kjo mund të më ndihmojë në të ardhmen. Ka shumë gjëra që kam mësuar, pastaj nuk shkoi gjithçka në mënyrë pozitive, por jam shumë i motivuar për këtë aventurë timen të re këtu”, u shpreh francezi.
Bakayoko kur është pyetur për diferencat mes kuqezinjve dhe Juventusit, ai ka thumbuar duke thënë se Milani është një ekip që ka fituar më shumë. “Nuk dua të bëj krahasime, Milan ka një histori shumë të madhe, ka fituar më shumë se Juventus që gjithsesi është një klub shumë i mirë, por unë dua të luaj te Milan dhe nuk dua të ndodhem në një vend tjetër nga ky”.
