Humbja me rivalët direkt për titull, Skënderbeun, zhgënjeu pa masë presidentin e Kukësit, Safet Gjicin, i cili nuk ka duruar dhe menjëherë sapo stafi teknik është kthyer nga Kukësi në Tiranë ditën e hënë në darkë, kreu i klubit ka bërë një mbledhje te rezidenca e tij në kryeqytet.
Ultimatumi
“3 fitore rresht, 9 pikë të fituara në tri takimet e ardhshme, nëse nuk ndodh kjo nuk ka më justifikime”, u ka thënë Gjici stafit. Ndërsa një porosi tjetër e presidentit ka qenë në lidhje me Rauf Alijev. Futbollisti më i paguar i Kukësit me plot 8 mijë euro në muaj nuk ka shënuar asnjë gol në katër takime, por më e keqja, sipas presidentit, është se pse ai nuk po del në lojë, as raste, as i rrezikshëm dhe se çfarë po bëhet me të.
Gjici ka pyetur se pse trajneri nuk po i gjen dot vendin dhe pse lojtari i Kombëtares azere nuk po përshtatet dot. Këto pyetje e kanë vënë në vështirësi trajnerin Milinkoviç dhe stafin e tij. Ndërkaq, presidenti ka shprehur hapur zhgënjimin nga mbrojtja, të cilët i ka kritikuar ashpër te trajneri, pasi në ndeshje mungoi Shameti dhe mbrojtja u shthur.
Numri një i klubit ka ngelur në klasë gjithë skuadrën përveç Krkotiç dhe Kale, të cilët, sipas tij, kishin zhvilluar paraqitje të denjë duke luftuar në fushë. Nëse nuk arrihen 9 pikë në tri takimet e radhës, gjobat dhe masat nuk do mungojnë. Verilindorët u mundën në fushën e tyre nga Skënderbeu 2-1 duke mos bërë paraqitje të mirë. Synimi i kuksianëve është që të mbrojnë titullin kampion, në një kohë që shpenzimet e presidentit kanë qenë të konsiderueshme.
