Në një intervistë të dhënë për mediat ditën e sotme, presidenti i ekipit të Kukësit, Safet Gjici ka zbuluar planin e një stadiumi të ri modern që do të ndërtohet atje. Ky stadium do të ketë një kapacitet 8-10 mijë veta dhe do të kapë vlerën e 3-4 milion eurove. Po ashtu Gjici ka akuzuar edhe për bashkinë e qytetit për moskorrektësi dhe se i ka akoma borxhe, duke ia lenë të gjithë barrën e ekipit atij. Nuk i ka dalë akoma pishmani i eliminimit nga ekipi i Sherif Tiraspolit, që në turin e parë të Champions League.
“Ne kemi si synim të ndërtojmë një stadium me një kapacitet prej 8-10 mijë vendesh, aq sa na lejon edhe terreni. Kostoja e tij do të jetë rreth 3-4 milionë euro, sepse ne do ta bëjmë vetë, për të eliminuar normën e fitimit, që mund të marrin firmat e tjera. Synojmë që aty të luajmë ndeshjet e Europa League-s. Me atë ekip kemi qenë të pafat. Fillimisht kemi humbur atje dhe më pas humbëm 11 metërsh këtu, me Pejiç. Mendoj se ishim më të mirë dhe duhet të kualifikoheshim, por për fat të keq nuk ia dolëm”, tha Gjici për Zona gol te supersport.
