Deputeti i Kurbinit, Gjetan Gjetani, nuk është më pjesë e Grupit Parlamentar të PS. Vendimi u mor zyrtarisht në mbledhjen e grupit, pas ultimatumit të kryeministrit Edi Rama direkt nga Asambleja. Sikundër e kishte paralajmëruar edhe më herët se ai është socialist, dhe se nuk do të ndryshojë bindjet e tij pavarësisht vendimit të Ramës, Gjetani është shfaqur në Kuvend.
Deputeti socialist ka qenë i pranishëm në seancë. Ai ka ngritur kartonin jeshil dhe ka votuar njësoj me socialistët, mes të tjerash edhe kthimin e dekretit të Presidentit Meta për lojërat e fatit.
Përjashtimi i tij erdhi pas deklaratave për policinë, të cilën e cilësoi si të paaftë e të korruptuar, nisur nga vrasjet e fundit në Mamurras.
Pas deklaratës së Ramës për përjashtim, ka qenë Taulant Balla, kreu i grupit parlamentar socialist ai që ka propozuar që të përjashtohet nga radhët e PS, deputeti Gjetan Gjetani.
“Kemi miratuar në unanimitet një rregullore, së cilës të gjithë duhet t’i qëndrojmë strikt, e duhet ta respektojmë. Kolegu ynë e theu atë dhe rregullorja i përcakton qartë pasojat”, mësohet të jetë shprehur Balla para deputetëve.
Gjetani përmes një statusi akuzoi Policinë e Shtetit për paaftësi, nisur nga disa akte kriminale në zonën e tij, duke paralajmëruar reagim popullor me të në krye.
