Gjermania vinte si kampione bote, por dështoi që të kalonte fazën e grupeve në Botërorin e Rusisë. Një eliminim i hidhur që e vulosi humbja 2-0 përballë Kores së Jugut. Një moment mjaft i rëndë në kampin gjerman që vë para përgjegjësisë vetëm një njeri dhe ai është trajneri Joachim Low.
Ky i fundit nuk arriti që të evitojë një “tragjedi” të tillë, pavarësisht se shenjat paralajmëruese ishin dhënë më herët. Teksa të gjithë tifozët gjermanë prisnin që Low të merrte përgjegjësitë në përfundimin e takimit dhe të largohej, ai ka zgjedhur që t’i përgjigjet në një moment tjetër kësaj çështje.
“Është kaq herët për mua që t’i përgjigjem pyetjes rreth shkarkimit tim. Dëshpërimi është ende brenda meje. Unë nuk mund ta imagjinoja këtë. Isha vërtet shumë optimistë dhe më duhen disa orë tashmë për të marrë veten. Do të flasim nesër”, ka thënë Low.
