Papunësia në shtetin e Gjermanisë për vitin 2017, ka arritur në nivelin më të ulët që nga ribashkimi me rënien e murit të Berlinit në fillim të 1990.
Shifrat kanë shkuar në gjashtë për qind, një tregues që tregon dinamikën dhe performancën e ekonomisë së parë evropiane. ”Në dhjetor, niveli i papunësisë ishte 5,5 për qind sipas të dhënave të korigjuara nga variacionet sezonale, ndërkohë që për të gjithë vitin ai ra në 5,7 për qind, niveli më i ulët që prej ribashkimit”, njoftoi sot Agjencia e Punësimit.
“Vitin e kaluar, numri i të papunëve ka rënë më 158000 persona duke arritur 2,53 milionë persona pa punë”-shkruan ATSH. Të dhënat e popullsisë në aspektin e papunësisë, tregojnë se janë gjithnjë në rënie, ndërsa ky është një indikator që tregon se Gjermania, jo vetëm ka stabilitet, por vijon të mbajë në nivele të ulëta numrin e papunësisë.
Të dhënat tregojnë se nga 6,9 për qind në vitin 2013, papunësia ra në 6,7 për qind në vitin 2014. Për vitin 2015 kjo shifër ishte në 6,4 për qind, ndërsa 6,1 për qind në 2016-ën. Aktualisht niveli i papunësisë ka mbërritur në nivelin e gjashtë për qindëshit, një shifër që pritet të zbresë akoma më poshtë, kjo e bazuar në objektivat e qeverisë gjermane.
