Gjermania duhet të bëjë mirë llogaritë për përballjen e sotme me Portugalinë, nëse dëshiron të shmangë eleminimin që në grupe. Humbja me Francën në ndeshjen e parë të grupit, e ka bërë shumë delikate përballjen e sotme. Përballë Portugalisë, minimimalisht gjermanët nuk duhet të humbasin. Por në rastin më të mirë, i duhet një fitore për të ndezur edhe një herë ambientin, qartësisht nën presion të madh pas humbjes së pësuar kundër Francës.
Shifrat e përballjeve i japin më shumë besim ekipit gjerman përpara kësaj finaleje të parakohshme. Në katër sfidat e fundit zyrtare, gjermanët kanë fituar gjithnjë përballë Portugalisë. Fitorja e fundit ishte në Botërorin e 2014. Sulmuesi gjerman Tomas Myler, për herë të parë dhe të fundit deri më tani, në një turne madhor, ka realizuar një “tripletë” pikërisht kundër Portugalisë.
Luzitanët do të udhëhiqen në këtë përballje nga Ronaldo, autor i një dygolëshi kundër Hungarisë, që e kthyen atë në golashënuesin më të mirë në historinë e evropianit. Por “CR7” nuk i ka shënuar kurrë Gjermaninë. Për trajnerin Lëv, Portugalia nuk është vetëm Ronaldo: “Ronaldo bën gjithnjë diferencën por Portugalia nuk është vetëm Ronaldo. Edhe Bruno Fernandes është një futbollist i mirë, ndërsa ne nuk e mbështesim lojën tek individët, për ne, lojtari jonë më i mirë është grupi. Duhet të jemi më kërkues aty përpara nëse dëshirojmë të mposhtim Portugalinë dhe të vijojmë më tej. Jemi të vetëdijshëm se mund të bëjmë më shumë se sa sfida kundër Francës, por duhet të jemi më të përqendruar në sulm”, theksoi Joakim Lëv në konferencë për shtyp.
Ndërkaq, Portugalia vjen me e qetë në këtë përballje. Por Portugalia ka edhe një armë më shumë, pasi ka “stofin” e kampiones në fuqi, fakt ky që është shumë domethënës për trajnerin Santos.
“Portugalia ka ndryshuar shumë në vitet e fundit, sot na respektojnë më shumë, kanë frikë nga ne. Gjermania? Janë një skuadër fantastike, me një grup të mbushur me lojtarë të mëdhenj, por të mendosh që Portugalia është favorite në shtëpinë e tyre më duket çmenduri, nëse e mendojmë kështu mund të humbasim”, u shpreh Fernando Santos në konferencë për shtyp.
