Java e 21-të e Superiores, solli një përballje mjaft interesante dhe shumë të luftuar mes Laçit dhe Kukësit. Kurbinasit rezistuan shumë gjatë, por në minutat e fundit u ndëshkuan nga gjeorgjiani, Dzaria, i cili i dha tre pikë mjaft të rëndësishme Kukësit. Të dyja ekipet ishin me mungesa të shumta.
Pjesa e parë nisi me ritme të larta për miqtë të cilët sulmuan rrezikshëm me Gurin dhe Shkodrën, por Selmani u tregua mjaft i saktë dhe nuk lejoi që topi të prekë rrjetën. Minutat në vazhdim janë sulme e kundërsulme nga të dyja palët, që luajnë hapur dhe në kërkim të golit. Ka më së shumti dyluftime në mesfushë, ndërsa daljet nga krahët nuk përmbyllen me pasime efikase. Në minutën e 34-t përsëritet në të njëjtën formë ballafaqimi Guri-Selmani, me këtë të fundit, që del e hidhet në këmbët e sulmuesit shkodran, duke i thënë atij “jo”. Braziliani Kale ka një mundësi të mirë shënimi në minutën e 38-të, por godet pa shënjestër, mbi vijën e zonës kurbinase. Dhjetë minutat e fundit të pjesës së parë rritet presioni i vendësve. Laçi mezi arrin të dalë nga gjysmëfusha e vet, ku detyrohet të përveshë mirë mëngët, për të larguar pasimet infiltruese të Shkodrës dhe krosimet e sakta të Rrumbullakut nga e majta.
Pjesa e dytë nis me dy mundësi optimale për kurbinasit. Eskerda infiltron një top të bukur për Lushkjen, i sapohedhur në lojë, por kavajasi nuk finalizon dot. Më pas është Lulaj, që i pambulur, nuk e devijon dot krosimin e gjatë të shokëve të skuadrës. Kurbinasit janë më të zhdërvjellët, dalin më lirshëm në fazën ofensive, duke e barazpeshuar disi lojën. Por, në minutën e 64-t mbesin me 10 lojtarë në fushë, pasi braziliani Eskerda, në mënyrë krejt të panevojshme, merr kartonin e dytë të verdhë.
Në fushë hidhet edhe Balde, një sulmues me shumë eksperiencë, por goditjet e shtuara nga këndi nuk mjaftojnë për të nxjerrë në dritë golin deri në minutën e 80-të, kur portiere Selmani gabon, duke mos e larguar si duhet topin, teksa godet së afërmi Dzaria, duke zhbllokuar shifrat dhe përligjur përpjekjet e mëdha të vendësve. Xhixha ka në këmbët e tij golin e barazimit në kohën shtesë, por i vetëm me portierin Koliqi gabon rëndë, godet jashtë kuadratit. Tri pikë të çmuara për Kukësin, që konsolidon pozitat në ndjekje të kreut, aktualisht me pikë të barabarta, nga 35 të tilla, me Flamurtarin, që nga ana e vet do të luajë sonte në Durrës.
Lushnja 2-3 Kamza
Kamza bën detyrën në Lushnje, merr tre pikë dhe siguron objektivin e vendosur në fillim të sezonit, mbijetesën. Ndreu e nis me Plakun në majë të sulmit, të asistuar nga Fili, ndërkohë që nuk ka vend për Raçiç në formacionin startues. Loja është mjaft intensive që në fillim të sezonit ku nuk mungojnë rastet nga të dyja anët. Por duhet të prisnim deri në minutën e33’ për të shijuar golin e parë në këtë takim. Kamza zbret nga e djathta dhe gjen të përgjumur mbrojtjen lushnjare, topi shkon te Mehmeti, që nga afër godet dhe zhbllokon shifrat.
Sidoqoftë, epërsia 1-0 mbetet në fuqi vetëm 3 minuta. Në minutën e 36’ është goleadori lushnjar, Mikel Canka, ai që merr një asist me gjoks nga Sefa, godet fort nga afër dhe shënon në portën mike. Ndeshja hapet dhe bëhet më interesante. Pjesa e dytë shfaq oreksin e vendasve, që mundohen të s’postojnë lojën në gjysmëfushën e kundërshtarit. Ndreu aplikon kundërsulmin, por sulmi i tij nuk është në një ditë të mirë.
Pas dy mundësive të mira të vendësve, i porsafuturi në lojë, Racic, në minutën e 57-të, dyfishon shifrat për të tijtë. Një zëvendësim mëse i goditur për Kamzën. Sebino Plaku do të mbyllte historinë e kësaj ndeshjeje, teksa trefishon rezultatin në minutën e 71-të. Mbrojtja lushnjare qëndron statike, duke lejuar sulmuesin kryeqytetas të vërë në shina të sigurta fitoren e Kamzës. Goli në kohën shtesë i Cankës vetëm sa kompleton dopietën e tij, por nuk ndryshon gjë në fatin e ballafaqimit, që prodhoi plot 5 gola. Të besuarit e Ndreut ia dalin të marrin tri pikë të çmuara në këtë transfertë, duke konfirmuar dorëzimin lushnjar, por edhe ngjitur vetë në vendin e katërt, duke parakaluar Laçin.
