Ministrja e Punëve të Jashtme dhe Diasporës, Donika Gërvalla ka reaguar ndaj përfaqësuesit special të BE-së për dialogun, Miroslav Lajçak.
Ky i fundit mirëpriti vendimin e Qeverisë së Kosovës, për të shtyrë deri më 1 shtator aktin për reciprocitetin për targa dhe letërnjoftime. Gërvalla me anë të një postimi në Twitter ka shkruar se faktet mbeten fakte, dhe se shtyrja e vendimit për reciprocitet do të zbatohet vetëm nëse hiqen barrikadat.
“Faktet mbeten fakte. Kosova ka rënë dakord me propozimin e SHBA-ve dhe në përputhje me BE-në. Ne ramë dakord për një shtyrje deri më 1 shtator 2022, por vetëm nëse barrikadat hiqen deri më 1 gusht.
Reciprociteti do të mbetet realitet, Kosova nuk ka “shtyrë” asgjë, rregullorja për letërnjoftimet ka hyrë në fuqi nga mesnata”, ka shkruar Gërvalla.
