Gerrard pranë stolit të ekipit që mbart një histori të madhe

Pas tërheqjes nga futbolli, legjenda e Liverpool, Gerrard ka qenë në rolin e analistit sportiv dhe trajner i të rinjve tek “The Reds”, pasi e kishte shprehur dëshirën për të qëndruar pranë fushave të blerta. Tashmë duket se kjo dëshirë do të bëhet realitet me një ekip elitar, Steven Gerrard do të marrë drejtimin e ekipit skocez, Glasgow Rangers.Trajneri i të rinjve të Liverpoolit, gjatë një interviste të fundit pranoi se ka zhvilluar bisedimet e para me drejtuesit e klubit skocez dhe se gjithçka ka qenë pozitive. Ish-kapiteni i “The Reds” sqaroi më tej se të premten do të takohet sërish me drejtuesit e Rangers dhe më pas do të marrë një vendim përfundimtar sa i takon të ardhmes së tij. Pavarësisht humbjes së thellë 5-0 në derbin me Celtic, që kurorëzoi rivalët e përjetshëm kampionë të vendit, Gerrad është i bindur se mund ta kthejë skuadrën legjendare skoceze në nivelet më të larta.