Pak ditë më parë, Ministria e Brendshme nxori një urdhër, ku ndalonte importin dhe tregtimin e kapsollave. Nëse çdo gjë do funksionojë sipas planit, për rrjedhojë do të marrin fund shpërthimet dhe plagosja e qytetarëve.
Deklarata
“Ministria e Brendshme u kërkon të gjitha subjekteve tregtare që të ndërpresin importin, magazinimin dhe tregtimin e të gjitha lëndëve plasëse, mjeteve shpërthyese dhe piroteknike me efekt të tillë, të cilat i drejtohen tregut të gjerë. Nxisim të ndërpritet menjëherë tregtimi dhe të dorëzojnë produktin me këtë përmbajtje, duke lajmëruar sa më parë Komisariatin pranë. Kushdo që do të kapet me këtë produkt, apo do të disponojë individualisht të tilla lëndë, do të ndalohet e ndëshkohet.
Në prag të festave të fundvitit, Ministria e Brendshme u bën thirrje prindërve, familjarëve dhe kujdestarëve që të mos inkurajojnë dhe të mos lejojnë përdorimin e mjeteve të sipërpërmendura nga fëmijët apo të rriturit. Gjithashtu, Ministria e Brendshme fton të gjithë qytetarët që të raportojnë në të gjitha rrugët e mundshme rastet e tregtimit apo përdorimit të lëndëve plasëse, atyre shpërthyese dhe mjeteve piroteknike”, citohet në deklaratën për media.
Ministria e Brendshme po përgatit një projektligj
Mesa duket, aksioni do të vijojë përgjatë gjithë ditëve të dhjetorit, ku do ndalohet tregtimi dhe përdorimi i kapsollave që përmbajnë sasi eksplozivi. Ndërkohë “Report TV” ka mësuar se Ministria e Brendshme po përgatit një projektligj për ta çuar në Parlament, i cili parashikon ndalimin e importit për të gjitha llojet e kapsollave në Shqipëri. Me këtë projektligj, synohet që në vendin tonë, të mos vijnë më kapsolla, por vetëm fishekzjarre, të cilat do të kategorizohen te mjetet argëtuese.
Kjo çështje është trajtuar më gjerë edhe në rrjetet sociale. Qytetarët ndahen në dy grupe nëse është një vendim i drejtë apo jo. Një vlerësim ka shprehur edhe gazetari Armand Bajrami, i cili shkruan se ndërprerja e tyre realizohet me ligj.
“Kam përshtypjen se ndërprerja e importimit, magazinimit dhe tregtimit të kapsollave (që konsiderohen si fishekzjarre festive) apo çdo lloj produkti realizohet me ligj, dhe jo me thirrje nga podiumi i Ministrisë së Brendshme”.
