Sipas të gjitha gjasave Xherdan Shaqiri shumë shpejt do të bëhet me ekip te ri. Mesfushori kosovarë që luan për Zvicrën ka kaluar një sezon fantastik me Stoke Cityn pavarësisht se ekipi i tij ra nga Premier League.
Shaqiri ka shënuar tetë gola dhe ka dhuruar shtatë asistime me fanellën e Stoke Cityt në elitën e futbollit anglez. Por rënia e Stokes një kategori më poshtë ka bërë që Shaqiri publikisht të kërkoj largimin. Me rënien e skuadrës së tij në Championship, është aktivizuar klauzola e largimit e Shaqirit nga Stoke për një shumë prej 14,5 milionë euro.
Liverpool është futur në garë për të siguruar shërbimet e Shaqirit dhe duket se e ka shumë seriozisht. Gazetari anglez i Bleacher Report, Dean Jones që ka konfirmuar se agjentët e Xherdanit janë takuar me Liverpoolin ditën e premte.
“Liverpool ka mbajtur bisedime me agjentët e Shaqirit të premten, marrëveshja duket afër”, ka shkruar në Twitter gazetari i Bleacher Report, Dean Jones. Mbetet të shihet nëse The Reds do të tentojnë të mbyllin marrëveshje para fillimit të Kampionatit Botëror.
Interesim për Shaqirin kanë shprehur shumë skuadra të njohura si Everton, Tottenham Hotspur, Newcastle United, West Ham United, Southampton, Crystal Palace, Huddersfield, Eintracht Frankfurt, Borussia Dortmund dhe Galatasaray. 26-vjeçari më parë ka luajtur edhe për Interin, Bayernin dhe Baselin.
