Gazeta e parë dhe e vetme në gjuhën shqipe, në Mal të Zi, “Koha Javore”, shënoi sot 15-vjetorin e themelimit të saj.
Me rastin e këtij 15-vjetori, në Hotelin “Mediteran”, në Ulqin, u organizua një takim ku të pranishëm ishin përfaqësuesit politikë të shqiptarëve në Mal të Zi, Ambasadori i Shqipërisë në Mal të Zi, Ernal Filo, Ambasadori i Kosovës në Mal të Zi, Skënder Durmishi, përfaqësuesi i Ambasadës së Amerikës, Bernard Çobaj, Anëtarët e Kryesisë së Lëvizjes Vetvendosje nga Kosova, Boiken Abazi dhe Xhelal Sveçla, si dhe figura të tjera të njohura nga jeta shoqërore e kulturore e shqiptarëve në vendin fqinj.
Në këtë event, fillimisht të pranishmëve iu drejtua kryetari i Këshilli Kombëtar të shqiptarëve, Genci Nimanbegu, në kuadër të së cilës edhe vepron gazeta “Koha Javore”.
Për historikun e gazetës foli redaktori përgjegjës i gazetës, Ali Salaj, kurse për rëndësinë e kësaj gazete foli edhe kryetari i Këshillit Programor, Gjekë Gjonaj.
Një ndër pikat më të forta gjatë dialogut të hapur mes të pranishmëve ishte gjetja e fondeve dhe burimeve njerëzore në të ardhmen, me qëllim që gazeta “Koha Javore”, të vazhdojë informimin e popullatës shqiptare.
