Milan ka marrë një fitore mjaft të rëndësishme përballë Romës në “San Siro” në sekondat e fundit falë golit të Cutrone. 2-1 ka përfunduar ndeshja ku të besuarit e Di Francesco-s “bien” rezistojnë deri në fund, por gjithçka u vendos kur pritej vërshëllima e fundit e arbitrit.
Ndeshja nis mjaft mirë për kuqezinjtë e Gattusos që me Calhanoglu në fushë duken më të qetë dhe kanë kontrollin e lojës. Të dy ekipet përpiqet të rrezikojnë portat në pjesën e parë, por janë mbrojtjet ato që fitojnë deri në minutën e 39’. Është Kessie ai që ka dërguar topin në rrjet për Milanin, pas një asist mjaft të bukur nga Rodriguez, ndërkohë që mbrojtja e Romës ishte fokusuar pas Higuain.
Problemet e treguara nga kuqezinjtë në mbrojtje, në takimin kundër Napoli-t, janë parë edhe në minutën e 59-të, kur Fazio ka barazuar për verdhekuqtë pasi mbrojtja vendase nuk ka arritur të largojë topin në mënyrën e duhur nga zona e rreptësisë.
Më pas është Higuain që gjen golin e avantazhit sërish, por ndërhyrja e VAR prish festën e kuqezinjve, pasi argjentinasi ishte në pozicion jashtë loje. VAR ishte përsëri protagonist në minutën e 81-të, duke anuluar golin e realizuar nga N’Zonzi, që ka kontrolluar topin me dorë para se ta dërgonte në rrjetë.
Kur mendohej se ndeshja do të mbyllej barazim, ka ardhur goli i Cutrone që i ka dhuruar një fitore shumë të rëndësishme vendasve. Pas një asisti perfekt nga Higuain, sulmuesi i ri i “Djallit”, ka mposhtur me lehtësi Olsen dhe i ka dhuruar 3 pikët milanezëve.
