Gardiani kuqezi me objektiva të mëdha: Dua Champions Leaguen

“Gardiani” i portës kuqezi është duke kaluar një formë fantastike në sezonin e tij të parë si titullarë tek Lazio. Strakosha është kthyer në një pikë referimi tek skemat e Inzaghi-t dhe nuk e ka diskutuar formacionin titullarë, po ashtu ka ndihmuar shumë që Lazio të renditet në vendin e tretë. Ëndrra e tij e madhe është që këtë vit të luajnë në Champions League dhe momentalisht është e realizueshme, por humbja përballë Genoas e rrezikoi atë pozitë.

Lazio është duke konkurruar në tre kompeticione dhe ka treguar karakter si skuadër duke dhuruar performaca mjaft të larta. Finalja e Kupës së Italisë është një ndër objektivat e mundshëm, ku do të përballen me Milanin në “Olipico”. Ndërsa në Europa League do të përballet ne 1/8 me Steauan e Bukureshtit për të vazhduar më tutje dhe gara për një pozitë sa më të lartë në kampionat.

Numri 1 i portës së kryeqytetasve gjithsesi sheh nga e ardhmja, duke theksuar se objektivi i tij personal, por edhe ai i klubit është rikthimi në Europën që vlen. “Shpresoj ta mbyllim kampionatin në zonën Champions, për të marrë nga ky sezon atë që na takon”, – theksoi me bindje 22-vjeçari shqiptar gjatë një ceremonie me një klub tifozësh lokalë në Latina. Në vijim, Strakosha u ndal te rritja e tij e pabesueshme gjatë muajve të fundit, ku falë reflekseve të pastra ka arritur t’i sigurojë Lazios një numër të madh pikësh. “Merita kryesore për këtë shkon tek përgatitësi im Griggioni”, – shton numri 1 bardheklatër, që gjatë këtij sezoni mes Europës, Kupës dhe kampionatit numëron 23 ndeshje si titullar.