Kandidati në garë për kreun e PD-së, Eduard Selami ka reaguar para pak minutash, ku i bën publike dy kërkesat që ka ndaj rivalit të tij, Lulzim Basha.
Me anë të një postimi në Facebook, Eduard Selami shkruan se kjo gara është e pabarabartë, por ai dëshiron që PD t’u rikthehet vlerave demokratike.
Për këtë arsye, Selami ka dy kërkesa për Bashën: “të mbajë premtimin që më ka bërë se debatet mes nesh do të bëhen të hapura për mediat dhe për publikun, gjë që sipas tij nuk ndodhi në debatin e Korçës; dhe të bëjë publike listën e anëtarëve të partisë demokratike të cilët do të votojnë.
POSTIMI I PLOTË I SELAMIT:
Të dashur miq.
Gara për kryetar të Partisë Demokratike është në kulmin e saj. Ju falenderoj të gjithëve për mbështetjen që më keni dhënë këtë periudhë.
E kam thënë më parë se kjo garë është e pabarabartë nga ana strukturore por është tërësisht e fitueshme.
Unë dua që PD t’i kthehet edhe njëherë vlerave demokratike dhe perëndimore të saj.
Për këtë, i kërkoj zotit Basha të mbajë premtimin që më ka bërë se debatet mes nesh do të bëhen të hapura për mediat dhe për publikun. Kjo nuk ndodhi në debatin e Korçës.
Së dyti, i kërkoj të bëjë publike listën e anëtarëve të partisë demokratike të cilët do të votojnë. Nuk ka asnjë arsye që këto lista të mbahen të fshehta, ne nuk jemi parti e jashtëligjshme. Duhet transparencë. Anëtarët e PD janë krenarë që janë demokratë dhe nuk kanë frikë që të fshehin anëtarësinë ndaj hape partinë zoti Basha!
Së bashku do ta fitojmë këtë garë dhe do dalim më të fortë.
