Shtatë vendeve më të fuqishme të botës u janë bashkuar edhe aleatë nga Lindja e Mesme, të martën, në synimin për të izoluar presidentin sirian Bashar al-Assad, vetëm pak orë përpara se Sekretari amerikan i Shtetit, Tillerson, të udhëtojë drejt Moskës, aleatit kyç të Assadit.
Ministrat e Jashtëm të G7-s janë takuar orët e para të së martës me homologët e tyre nga Turqia, Arabia Saudite, Emiratet e Bashkuara Arabe, Jordania dhe Katari, që të gjithë kundërshtarë të regjimit të Assadit, për të diskutuar mbi luftën civile 6-vjeçare në Siri.
Ndërkohë, presioni sa vjen e shtohet ndaj Rusisë për të shkëputur marrëdhëniet e ngushta me Assadin, i cili akuzohet për sulmin me armë kimike ndaj një qyteti të kontrolluar nga rebelët, gjatë javës së kaluar.
Të hënën, kryeministrja britanike, Theresa May, foli me presidentin amerikan, Donald Trump, e të dy së bashku ranë dakord se “ekziston një mundësi” për të shtyrë Rusinë të prishë marrëdhëniet me Assadin, kjo të paktën sipas zyrës së May.
Po të hënën, Britania dhe Kanadaja thanë se sanksionet duhet të përshkallëzohen ndaj Moskës, nëse vijon mbështetjen e Assadit. Më vonë gjatë ditës së djeshme, Trump foli në telefon me Kancelaren gjermane, Angela Merkel, pikërisht për sulmin me raketa të javës së kaluar ndaj bazës ajrore siriane, si dhe e falënderoi atë për mbështetjen e dhënë Shteteve të Bashkuara.
“Mendoj se duhet të shfaqim një pozicion të bashkuar në këto negociata, duhet të bëjmë gjithçka mundemi për të larguar mbështetjen e Rusisë për Assadin, të paktën deri në pikën kur të jetë të gatshëm për të marrë pjesë në gjetjen e një zgjidhjeje politike”, tha ministri i Jashtëm gjerman, Sigmar Gabriel. “Tashmë është momenti i duhur për të diskutuar për mënyrën sesi komuniteti ndërkombëtar, përfshi Rusinë, Iranin, Arabinë Saudite, Europën dhe Shtetet e Bashkuara, mund të ecin drejt procesit të paqes për Sirinë, e për të shmangur përshkallëzimin e konfliktit”.
Tirana Today
