Prokurorja e Përgjithshme Arta Marku i ka kërkuar prokurorit të Durrësit, Agron Gjanës, që të dorëhiqet.
Kërkesa i është komunikuar Gjanës në një takim që ky i fundit ka mbajtur sot me Arta Markun.
Megjithatë, Agron Gjana, ka refuzuar kërkesën e kryeprokurores, pasi nuk ka pranuar të japë dorëheqjen. Kështu, Marku ka shkarkuar edhe Agron Gjanën, prokurorin e emëruar nga Llalla, duke emëruar në vend të tij drejtues të përkohshëm, Donika Prelën, aktualisht prokurore pranë kësaj prokurorie.
Mbetet e paqartë arsyeja e kërkesës për dorëheqjen e Gjanës, ndërsa emri i këtij të fundit ka qenë në fokus të medias edhe disa vite më parë.
Gjana është pjesë e grupit të prokurorëve që iu është refuzuar viza nga ambasada amerikane. Në prill të vitit 2016, ambasada amerikane sqaroi se Gjana nuk përmbushte kushtet për të marrë vizë sepse ekzistonte rreziku që prokurori mund të mos kthehej më në Shqipëri.
Vendimi per prokurorin e Durresit
Në vijim të procesit për riorganizimin dhe rritjes së performancës të organit të akuzës, Prokurori i Përgjithshëm, znj. Arta Marku nënshkroi ndryshimet si më poshtë:
Duke filluar nga dita e sotme, datë 09. 01. 2018,
- Agron Gjana, Drejtues i Prokurorisë së Rrethit Gjyqësor Durrës, largohet nga kjo detyrë dhe caktohet në pozicion të përkohshëm si prokuror në Prokurorinë e Rrethit Gjyqësor Pukë.
- Drejtues i Përkohshëm i Prokurorisë së Rrethit Gjyqësor Durrës, caktohet zj.Donika Prela, aktualisht prokurore pranë kësaj prokurorie.
Levizjet ne rrethe
Duke filluar nga dita e sotme, datë 09. 01. 2018,
- Dritan Gina, Drejtues i komanduar i Prokurorisë së Rrethit Gjyqësor Elbasan, i ndërpritet komandimi dhe kthehet si prokuror në Prokurorinë ku është i emëruar;
- Drejtues i Përkohshëm i Prokurorisë së Rrethit Gjyqësor Elbasan, caktohet prokurori, z.Ardjan Nezha.
- Pali Deçolli, Drejtues i komanduar i Prokurorisë së Rrethit Gjyqësor Fier, i ndërpritet komandimi dhe kthehet si prokuror në Prokurorinë ku është i emëruar;
- Drejtues i Përkohshëm i Prokurorisë së Rrethit Gjyqësor Fier, caktohet prokurori, z.Fatmir Lushi.
- Artur Ismailukaj, Drejtues i komanduar i Prokurorisë së Rrethit Gjyqësor Kukës, i ndërpritet komandimi dhe kthehet si prokuror në Prokurorinë ku është i emëruar;
- Drejtues i Përkohshëm i Prokurorisë së Rrethit Gjyqësor Kukës, caktohet prokurori, zj.Alketa Nushi.
