Policia e Vlorës ka proceduar penalisht administratorin dhe menaxherin e një karburanti në portin e Himarës, pasi u kapën duke shitur karburant në mënyrë të paligjshme.
Pas informacioneve të siguruara për aktivitet të jashtëligjshëm në një subjekt që tregton hidrokarbure, Specialistët për Hetimin e Krimeve Ekonomike dhe Financiare të DVP Vlorë organizuan një kontroll në portin e Himarës. Gjatë operacionit, u konstatua se përfaqësuesit e subjektit po shisnin rreth 6,000 litra benzinë për mjete lundruese, përmes një autoboti, pa përdorur pajisje fiskale automatike, në shkelje të ligjit për fiskalizimin.
Në përfundim të veprimeve procedurale, u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Vlorë dhe nisi procedimi penal për shtetasin S.K., 40 vjeç, banues në Krujë, administrator i karburantit, dhe M.R., 51 vjeç, banues në Himarë, menaxher i subjektit.
