Deputeti i Partisë Socialiste, Artan Gaçi, ka njoftuar sot, përmes një letre, se ai nuk do të kandidojë më për deputet në zgjedhjet e ardhshme.
Përmes një letre drejtuar kryetarit të PS-së, Edi Rama, dhe kryetarit të grupit parlamentar, Gramoz Ruçi, Gaçi shkruan se ka vendosur të tërhiqet dhe se nuk do të kërkojë kandidimin për një mandat të tretë si përfaqësues i qarkut të Tiranës, në Kuvendin e Shqipërisë.
Letra e Artan Gaçit ku komunikon heqjen dorë nga kandidimi
Për 8 vjet, me mandatin e deputetit të Partisë Socialiste, pata fatin të përfaqësoj në parlament qarkun e Tiranës. Një mandat në opozitë e një në mazhorancë, gjatë të cilave shpresoj që duke dhënë maksimumin tim, të kem përmbushur sadopak besimin e dhënë. Për këtë mundësi, dua të falënderoj të parin, Kryetarin e PS, mikun tim Edi Rama, i cili ishte i pari që besoi tek unë dhe shumë të tjerë si unë, duke thyer shume tabu, përfshirë atë të mospërfaqësimit të sipërmarrjes në PS e në parlament. Falë asaj largpamësie, sot qasja e PS dhe e qeverisë ndaj sipërmarrjes është tranformuar në një marrëdhënie besimi, shërbimi e respekti reciprok, frutet e të cilës do i shohim çdo ditë e më shumë.
Falënderoj kryetarin e grupit parlamentar të Partise Socialiste, Gramoz Ruci, që me seriozitetin dhe me urtesinë e tij vazhdon të jetë një garanci e madhe e ruajtjes së ekuilibrave në reformimin e vazhdueshëm e pozitiv në Partinë Socialiste. Pavarësisht rrënjëve tradicionale të tij, mbetet një nga njerëzit më të hapur e më mbështetës të modernizimit të kësaj familjeje të madhe dhe një mik i shtrenjtë për gjithsecilin nga ne. Falënderoj gjithë kolegët deputetë socialistë, me të cilët kemi ndarë beteja të rëndësishme në opozitë e sfida vendimtare gjatë 4-vjeçarit të qeverisjes me reformat e papara ndonjëherë në historinë e tranzicionit. Falënderoj të gjithë drejtuesit, anëtarët dhe votuesit e PS në rrethin e Tiranës, në Kashar, Vaqar, Pezë, Ndroq, Vorë, Prezë, Farkë e Berxull, me të cilët ndava sfidat e vështira të riorganizimit, dhe në saj të kontributit të madh të gjthsecilit prej tyre, arritëm të reformojmë totalisht Partinë Socialiste në rrethin e Tiranës duke e kthyer mbas shumë vitesh në forcë fituese absolute në sejcilën prej këtyre njësive. Me këto falënderime po i paraprij vendimit për të moskandiduar një mandat të tretë si deputet, me garancinë se mirënjohja dhe kontributi im për vendin dhe Partinë Socialiste nuk mbyllet me këtë vendim. Përkundrazi, janë të pafundme dimensionet dhe hapësirat për cilindo që do të kontribuojë, të cilat nuk kushtëzohen e as nuk mund të mbyllen vetëm në sallën e parlamentit. Jam shumë i bindur se do ia dalim të kapërcejmë edhe këtë situatë të veshtirë, ku tentojnë të na fusin jo vetëm drejtuesit e Partisë Demokratike, por të gjitha forcat e errëta antishqiptare të aktivizuara në maksimum për të bllokuar këtë rilindje historike të shqiptarëve në Ballkan. Edhe unë, si pjesa me e madhe e shqiptarëve, jam krenar që jam pjesë e kësaj force politike, drejtuar nga Edi Rama, e cila është shpresa dhe garancia e vetme dhe e madhe e çdo shqiptari patriot që e do Shqipërinë pjesë të Europës, që e do këtë vend të bukur e drejt rrugës së zhvillimit, që i do shqiptarët krenare e dinjitoz, dhe pas shumë shekujsh, të ndihen dhe të respektohen si mirefilli europian.
