Policia ka arrestuar dy shtetas shqiptarë, pasi dyshohen për prodhim dhe shitje të lëndës narkotike.
Në pranga kanë përfunduar Kaman Lumani, 28 vjeç, banues në Përmet dhe Mariglen Coha, 26 vjeç, banues në Elbasan.
Gjithashtu, policia ka arrestuar edhe shtetasin grek, Anastazios Extadakstilios, 29 vjeç, si bashkëpunëtor i shqiptarëve, mbi të cilin rëndon akuza “Përkrahje autorit të krimit”.
Arrestimi i këtyre shtetasve u bë pas operacionit të zhvilluar në zonën e Yzberishtit. Lumani dhe Extadakstilios kanë qenë shpallur në kërkim nga Drejtoria Vendore e Policisë Vlorë, si të dyshuar për kryerjen e veprës penale të “Prodhimit dhe shitjes së narkotikëve të kryer në bashkëpunim”, dhe strehoheshin në banesën e marrë me qira nga shtetasi Mariglen Coha.
Gjithashtu, policia sekuestroi, pas kontrollit në banesën e tyre, një sasi rreth 1 kilogramë lëndë e dyshuar narkotike e llojit “Cannabis Sativa”, si dhe tre telefona celular.
