Ditën e premte me fillim në 18:00, kombëtarja U-21 do të zhvillojë një përballje mjaft të rëndësishme përballë Irlandës së Veriut, e cila është e vlefshme për kampionatin europian për të rinj. Një fitore në këtë sfido do ti bënte reale shanset që ekipi Shpresat të kapte vendin e dytë në këto eliminatore. Duke pasur parasysh rëndësinë e kësaj ndeshje FSHF ka bërë të ditur se dyert e stadiumit “Selman Stermasi”, do të jenë të hapura për tifozët.
Kjo është një sfidë mjaft delikate dhe shanset për ta fituar janë reale, pasi në ndeshjen e parë irlandezët fituan me fat në fundin e takimit me anë të një 11-metërshi. Në konferencën për shtyp para ndeshjes trajneri i ekipit, Alban Bushi u shpreh optimist për një fitore dhe se objektivi vendi i dytë është i mundshëm me këtë grup lojtarësh që ka në dispozicion. Për këtë arsye FSHF, ka vendosur që të jetë Hyrja Falas, për të qenë sa më plot stadiumi dhe të motivohen djemtë në këtë ndeshje.
