Kombëtarja shqiptare do të përballet në datë 13 me Turqinë, në një ndeshje miqësore e cila do të zhvillohet në Antalya. Për të përgatitur këtë sfidë FSHF kishte vendosur që ta grumbullonte ekipin në Antalya dhe jo në Shqipëri. Rreth një javë ata kanë qëndruar atje dhe kanë përgatitur sfidën të qetë dhe larg kamerave.
Për këtë arsye, për të shmangur kritikat FSHF ka dalë në një reagim zyrtarë, për të sqaruar të gjithë se pse është zgjedhur që ekipi të grumbullohet jashtë Shqipërisë.
Deklarata e plotë e FSHF
Kombëtarja e futbollit ka qenë është dhe mbetet një vitrinë e jashtëzakonshme e futbollit shqiptar në botë, pa përjashtuar këtu edhe ekipet kombëtare të moshave.
Dhe, për të përgatitur këtë sfidë miqësore me Turqinë, bazuar edhe në programin e trajnerit të ekipit kombëtar, por mbi të gjitha, duke u mbështetur shumë edhe në kriterin sportiv, u vendos që grumbullimi të kryhet në vendin ku luhet ndeshja në Antalia, nisur edhe nga fakti që këtë qytet e frekuentojnë shumë skuadra të huaja klubesh, apo ekipesh kombëtare, për klimën dhe kushtet e jashtëzakonshme që ofrohen.
Për të përcaktuar vendin e grumbullimit të ekipit kombëtar, apo edhe organizimin e një ndeshjeje ka disa kritere që vlerësohen, si kriteri sportiv, ai publik, si dhe kriteri ekonomik.
Nisur nga kjo, nga ana sportive grumbullimi për këtë ndeshje ishte shumë më mirë të zhvillohej në Antalia, për faktin sepse lojtarët udhëtojnë më pak, janë shumë më të qetë dhe jashtë trysnisë dhe presionit, por edhe kushtet e stërvitjet janë perfekt.
Për këto arësye pas propozimit të trajnerit FSHF vendosi që grumbullimi të bëhet në Antalia. Nuk është hera e parë që grumbullime të tilla realizohen jashtë Shqipërisë.
Kryesisht për ti ofruar lojtarëve dhe skuadrës një infrastrukturë sa më perfekte dhe komode për të përgatitur një ndeshje, miqësore, apo zyrtare qoftë ajo. Legjendat urbane periferike të përcjella për izolime apo degdisje të skuadrës kombëtare, janë dhe do të mbeten thjesht një turbulencë e radhës.
Në lidhje me pjesën e injorimit të shtypit, zyra e shtypit e FSHF gjithmonë ka qenë dhe do të jetë në ndihmë të mbarë mediave në Shqipëri, sportive dhe jo vetëm, të cilat na pamundësi për të ndjekur ekipin kombëtar janë furnizuar me informacione të herëpasherëshme, pamje dhe foto, konferenca shtypi dhe prononcime, reagime dhe cdo gjë tjetër të ekipit kombëtar.
Nuk është e vërtetë që pyetjet janë bërë nga zyra e shtypit, por nga gazetarë të pranishëm në hotelin e ekipit kombëtar, shqiptarë dhe të huaj. Më pas, ato i janë përcjellë mediave në Tiranë, të cilat kanë pasqyruar në vijimësi dhe me intensitet ecurinë e grumbullimit të ekipit kombëtar.
