Në fshatin Skilaj të Lushnjës ka një problem të madh: shumica e djemve janë beqarë. Në fakt, kjo vjen si pasojë e mungesës së ujit të pijshëm dhe rrugës së shkatërruar.
Pra, vajzat e reja nuk pranojnë të martohen me djemtë, që banojnë në këtë fshat, për shkak të kushteve të këqija.
“Nuk na vinë nuset, e di sa çuna beqarë ka këtu? 30”, shprehet një grua.
Në një kronikë të publikuar nga Top Channel, këta banorë kërkojnë që t’u rregullohet rruga që i lidh me aksin nacional dhe të ndërhyhet në këtë zonë, pasi mungesa e rrugëve ka bërë që banorëve t’u shtohet largësia me qytetin.
Uji që shkon në shtëpitë e banorëve është i përzierë me ujëra të zeza, ndërsa jo më larg se dy muaj më parë 4 fëmijë të këtij fshati u prekën nga hepatiti.
“Ne paguajmë taksë gjelbërimi, ndriçimi, për plehrat, ndërkohë që këtu s’ka asnjë kusht. Shumica e djemve janë beqarë nën 27 vjeç pa perspektivë”, thotë një i ri, banor në Skilaj.
