Briken Calja është shpallur Kampion i Europës në stilin e shkëputjes në peshën 69kg në peshëngritje, duke zënë vendin e parë me 146kg. Në stilin e shkëputjes, Calja e nisi garën me 141kg, duke e realizuar me sukses provën e parë, ndërkohë që i suksesshëm është edhe në provën e dytë, kur ngre 143kg. Edhe në provën e tretë Briken Calja nuk gabon, ngre lart 146kg dhe siguron vendin e parë, duke marrë medaljen e artë në stilin e shkëputjes.
Ndërkohë që, Calja vazhdon garën me stilin e shtytjes, ku sërish është pretendent për të marrë medaljen e artë, çka do të thotë që mund të jetë i pari edhe në dygarësh. Një paraqitje mjaft e mirë e peshëngritësit nga Shtërmeni, që ashtu sikurse kishte premtuar, ka sjellë medalje nga Europiani që po zhvillohet në Bukuresht të Rumanisë.
Po në këtë peshë, 69kg, garon edhe peshëngritësi tjetër kuqezi Arbër Çerçizi, që e mbylli stilin e shkëputjes në vendin e shtatë, me 135kg. Ai e nisi mirë gatën, kur ngriti 135kg në provën e parë, ndërsa në të dytën tentoi 141kg, por pa sukses. Në provën e tetë, Çerçizi tenton 142kg për të hyrë në zonën e medaljeve, por dështon.
