Disa nga personat e vaksinuar nuk i kanë shpëtuar fruthit. Instituti i Shëndetit Publik pranon se ka edhe një kontingjent të prekurish nga sëmundja që shkon nga 3 deri në 5% të cilët rezultojnë të vaksinuar me të dy dozat, por organizmi i tyre nuk ka krijuar antitrupa për shkak të problemeve imunitare.
Burime për BalkanWeb nga ISHP, shprehen se numri i personave të prekur me fruth ka shkuar në 186, mes të cilëve 134 persona të infektuar në Tiranë, Lezha ka 14 raste, Vlora ka 8 raste, Dibra ka 6 raste dhe Durrësi me Kukësin 4 raste.
Në 65% e të rasteve të prekurit janë fëmijë nën 2 vjeç që nuk kanë mbushur moshën e vaksinimit ose nuk janë vaksinuar pas frikës së përhapur kryesisht në rrjetet sociale se vaksina ka lidhje me autizmin, ndërsa mësohet se të prekur ka edhe fëmijë deri në moshën 6-vjeçare që nuk kanë bërë asnjë nga dy dozat e vaksinës.
Zyrtarisht ISHP mohon që të ketë raste të rënda me komplikacione nga fruthi dhe sipas ekspertëve zgjerimi i epidemisë ka një rënie në ditët e fundit krahasuar me javën e parë dhe të dytë të shkurtit, raporton BalkanWeb.
Të njëjtat burime pohojnë për News24 se origjina e përhapjes së fruthit është e ndryshme. Në zonat bregdetare fruthi është importuar nga Italia, ndërsa në Kukës fruthi është importuar nga shtetas që kanë udhëtuar nga Kosova drejt Shqipërisë.
Për shkak të temperatura të ulëta ekspertë të institutit të shëndetit publik rekomandojnë që të prekurit me fruth të vet-izolohen në shtëpitë e tyre nëse i kanë kushtet për të qëndruar në një dhomë të veçantë.
Momentalisht nuk ka të dhëna zyrtare për raste të infektimit kolektiv, ndërsa ISHP përsërit apelin për vaksinimin e fëmijëve brenda datave të kalendarit vaksinal si dhe rivaksinimin e të lindurve në vitet 80-90. Në harkun kohor të dy muajve sëmundja e fruthit i ka marrë jetën dy foshnjave 4 dhe 7-muajshe.
