Policia ka gjetur një trup të pajetë në zonën e Niklës. Burimet nga policia bëjnë me dije se trupi i pajetë i përket 34-vjeçarit të zhdukur në Laç që prej datës 9 Korrik, Elion Hysës. Trupi është gjetur i groposur dhe dyshohet se është vrarë. Megjithatë trupi i gjetur do t’i nënshtrohet ekspertizës mjeko-ligjore për të përcaktuar shkaqet e vdekjes. Elion Hysa, njihet edhe me emrat Keisi dhe Elvis Hysa. Ai ishte denoncuar i zhdukur nga familjarët e tij.
34-vjeçari Hysa ka qenë në kërkim nga policia përpara se të zhdukej. Për të gjykata ka caktuar masën arrest me burg për një vrasje të ndodhur 3 vjet më parë, në 10 Korrik 2015 në qytetin e Sarandës. Ai rezulton i shpallur në kërkim si bashkëpunëtor në vrasjen e Edmond Theodhorit, pronar i një lavazhi në këtë qytet. Mes viktimës, 32-vjeç dhe autorëve ka pasur një grindje për shkaqe banale.
Një ditë më pas, 6 persona e kanë rrethuar Edmond Theodhorin dhe pasi i kanë shkatërruar makinën me leva dhe shkopinj bejzbolli e kanë qëlluar për vdekje me një pistoletë. Tre persona u arrestuan një ditë pas, ndërsa 3 të tjerë u shpallën në kërkim mes të cilëve edhe Elion Hysa.
Ngjarja në 2015
Edmond Theodhorin, ishte ndjekur dhe masakruar nga gjashtë persona. Lidhur me këtë ngjarje tre persona janë arrestuar menjëherë pas krimit dhe ata janç: Ledi (Enkelejd) Hysa, 25-vjeç, banues në Laç, Ylli Qemal Reçi, 23-vjeç, banues në Gjorm-Krujë dhe Ajman Agron Zyba, 21-vjeç, banues në Laç.
Nga hetimet e strukturave të Policisë Vlorë dhe Sarandë, në bashkëpunim me Organin e Prokurorisë Sarandë, ka rezultuar se më datë 09.07.2015, rreth orës 00:10, viktima është konfliktuar me autorët e dyshuar të shpallur në kërkim, shtetasit G.H, dhe K.H, (xhaxha dhe nip).
Pas këtij momenti, pak orë më vonë, më datë 10.07.2015, rreth orës 01:00 autorët e dyshuar pasi kanë vënë në dijeni në lidhje me konfliktin edhe shtetasit E.H., dhe shokët e këtij të fundit, e pikërisht, Ledi Hysa, Ylli Reçi dhe Ajman Zyba, (personat e mësipërm të arrestuar nga policia), kanë kërkuar të gjithë së bashku nëpër qytet dhe kanë gjetur viktimën, pikërisht në vendin ku kishte ndodhur konflikti një natë më parë.
Sapo e kanë konstatuar, kanë rrethuar mjetin dhe kanë thyer xhamat me shkop bejsbolli dhe me qytën e pistoletës.
Pas kësaj, njëri prej autorëve i është afruar dhe ka qëlluar një herë me armë zjarri në drejtim të Edmond Theodhorit, duke i shkaktuar vdekjen e menjëhershme.
Pas kryerjes së krimit, të gjithë autorët janë larguar menjëherë nga qyteti i Sarandës ku ndodheshin me pushime, në drejtim të vendbanimeve të tyre.
Policia thotë se po punon intensivisht për gjetjen dhe prangosjen e personave të shpallur në kërkim, Gani Rexhep Hysa, 41 vjeç, Elion Hysa, 31 vjeç, dhe Keivi Hysa, 23 vjeç, që të tre, banues në Gjorm-Krujë.
Kush është Eljon Hysa?
Policia e Kurbinit njoftoi disa ditë më parë se ka nisur hetimet pas denoncimit te bere nga babai i një 34-vjecari nga Laci, për zhdukjen e djalit te tij:
“Pranë Komisariatit të Policisë Kurbin ka bërë kallëzim shtetasi S.H., 63 vjeç, banues në Laç, ku pretendon se kanë humbur kontaktet me djalin, shtetasin K.(E).H., 34 vjeç, banues në Laç, që në datën 05.07.2018”- njofton policia, e cila shton se ky person ka qene i shpallur ne kërkim pasi gjykata ka “caktuar masën e sigurisë “Arrest me burg” për veprat penale “Vrasja me paramendim e kryer në bashkëpunim” dhe “Armëmbajtja pa leje”.
I riu kishte marrë një dyqan me qira në Nikël dhe në datën 5 korrik kishte lënë një takim me telefon me një person nga kjo zonë që kishtë një mobileri.
34-vjeçari rezulton edhe me emra të tjerë, Kejsi, Elvis dhe Eli. Por pas ditës së takimit, ai u zhduk pa gjurmë dhe familja nuk ka më asnjë informacion për të.
