Prokurori i ri i Elbasanit, Ardian Nezha, pas emërimit nga Prokurorja e Përgjithshme Arta Marku, ka mbërritur në zyrën e tij. Mësohet se Nezha ka qenë i shoqëruar nga përfaqësuesi i Prokurorisë së Përgjithshme, Kosta Beluri. Ky i fundit e ka prezantuar Nezhën në një mbledhje me vartësit e tij, me prokurorët dhe me oficerët e policisë gjyqësore.
Sipas burimeve të Tirana Today, Nezha vijon të jetë në godinën e Prokurorisë së Elbasanit, teksa nuk është larguar as pas mbledhjes.
Nga ana tjetër, Dritan Gina pas shkarkimit nga Marku, kërcënoi se nuk do të braktiste detyrën e tij dhe as nuk do të dilte nga zyra.
“Nuk braktis detyrën. Refuzoj të zbatoj vendimin e kryeprokurores së përkohshme. Unë nuk jam i komanduar. Jam i caktuar i përkohshëm dhe prokurori i përkohshëm nuk ka tagër ligjor për të më liruar nga detyra. Vendimmarrja i takon Këshillit të lartë të Prokurorisë”, u shpreh Dritan Gina në një deklaratë.
Megjithatë, mësohet se pas mbërritjes se kreut të ri të Prokurorisë së Elbasanit, nuk ka pasur ndonjë situatë të tensionuar mes palëve.
