Raporti i Paul Pogba dhe Jose Mourinhos ishte thyer prej kohësh dhe ishte e qartë që asnjë prej tyre nuk e duronte tjetrin. Debatet mes tyre fillonin në stërvitje dhe pasqyroheshin edhe në fushë. Në disa raste ‘Special One’ kishte marrë vendimin drastik për ta lënë në stol edhe pse francezi ishte në një formë të mirë dhe nuk ishte i dëmtuar.
Betejën në fund e fitoi Pogba, pasi Mourinho u shkarkua dhe francezi e transmetoi menjëherë në rrjetet sociale gëzimin. Vetëm disa minuta pas shkarkimit, Pogba publikon foton provokuese në Twitter.
“Caption this”, ose “Komentoni këtë”, me tag të faqes zyrtare të United. Pogba ka dashur sigurisht të thotë diçka. Nuk duket publicitet, sepse i ngjan shumë më tepër një shigjetimi ndaj portugezit që nuk e deshi kurrë. Foto u fshi pak çaste më pas, tregues se ishte diçka që dikujt tek United nuk i ka pëlqyer.
