Një foto e rrallë, që tregon skemën e kapjes së At Zef Pllumit gjatë tentativës së tij për t’u arratisur, është publikuar nga Dom Artur Jaku.
Ky i fundit, ka publikuar hartën që tregon rrugëtimin e At Zef Pllumit dhe skemën e kapjes nga komunistët në vitin 1967.
“Kjo hartë si vrragat e jetës së tij shënon udhën e arratisjes. I ngjan një rrezeje shprese në bunkerin e errësirës së madhe e të pashpresë. At Zef Pllumi, shënonte shtigjet e ikjes, ndërsa regjimi kyçte prangat e çmimit të lirisë!”, shkruan ndër të tjera Dom Artur Jaku teksa publikon foton.
Një ditë më parë, u publikua një tjetër foto e rrallë në 50-vjetorin e arrestimit të dytë të At Zef Pllumit nga historiani Kastriot Dervishi.
Ky i fundit shpjegonte se At Zef Pllumi provoi të arratisej nga Shqipëria nëpërmjet kufirit tokësor në Rrethin e Shkodrës, ku u nis i vetëm drejt kufirit dhe mori drejtimin e Qafës së Pejës. Ai arriti t’i shpëtojë syrit të rojeve kufitare të postës së Thethit, por në bjeshkët e Nikçit 8 punonjës të ndërmarrjes së pyjeve e pikasën dhe kërkuan dokumentin që duhej për të qarkulluar në ato zona. Ata dyshuan dhe e shoqëruan, e më pas e dërguan At Zefin në Tamarë, pikërisht atje ku do ta merrnin njerëzit e specializuar të regjimit, të cilët do t’i jepnin dënimin e dytë me 25 vjet burgim.
