Ministri i Brendshëm, Fatmir Xhafaj ka komentuar për herë të parë foton e famshme në krah të ish-diktatorit Enver Hoxha.
I ftuar në “Opinion”, Xhafaj dha një përgjigje për të gjithë kritikët, që e quan edhe atë një diktator për shkak të fotos së bujshme.
Fevziu ka nxjerrë në ekranin e madh të studios një foto, ku Xhafaj shfaqet në krah të diktatorit Enver Hoxha, ndërsa e ka ngacmuar duke e pyetur atë nëse e kujtonte këtë foto dhe kur ishte shkrepur.
E kujtoni këtë foto? Në çfarë rrethanash është shkrepur?
E kujtoj. Mirë dukem aty Fevzi, kam qenë i ri.
Kam qenë student në Fakultetin e Drejtësisë, në vitin e dytë. Ishte një buqetë me lule që dërgohej nga studentët e Kosovës. Meqë ardhja e tyre atë vit nuk u bë e mundur na e dhanë mua dhe zonjës t’ia jepnim.
Përse ju zgjodhën ju zoti Xhafaj?
Isha student, besoj që kam qenë student i mirë. Nuk ka arsye tjetër, unë nuk vija nga nomenklatura e lartë.
Ju njoftuan që do t’i çonit ju buqetën me lule?
Po, një natë më parë.
