Zbulohen detaje të reja lidhur me ekzekutimin e djeshëm të 64-vjeçarit, Memli (Afrim) Begalla, i cili u vra mbrëmë sapo ka tentuar të hipë në automjetin e tij.
Dyshohet se viktima mund ta ketë njohur atentatorin, pasi është qëlluar nga afër me 1 plumb në kokë, i cili rezultoi vdekjeprurës. Begalla është vrarë me silenciator, ndërsa për rrjedhojë nuk kanë dëgjuar të shtëna as banorët e pallatit dhe as bizneset afër. Ai rezulton t’u ketë borxh shumë personave, ndërsa dyshohet se edhe vrasja e mbrëmshme të ketë shkak borxhin nga ana e viktimës.
Sipas specialisteve të krimit ekonomik viktima kishte nen administrim disa biznese: ishte administrator i kompanisë “LAB”, i 2 dyqaneve qe tregtojnë goma, një në autostradë dhe një në Yzberisht. Afrim Begalla, i cili ka ndërruar emrin në Memli Begalla rezulton që t’u ketë shumë personave borxhe në shuma të mëdha eurosh dhe lekësh.
Me disa prej të cilëve ishte ende në procese gjyqësore. Ky mund të cilësohet edhe si krim i paralajmëruar, pasi rreth 3 vite më parë Begalla në po të njëjtin vend, ku u ekzekutua iu dogj qëllimisht automjeti i tij ‘land rover’ që kishte në përdorim, raporton BË. Policia ka verifikuar personat që viktima ka pasur konflikte për borxhe. Gjatë mesnatës në drejtorinë e policisë të Tiranës është shoqëruar një person si i dyshuar për ngjarjen, si dhe po verifikohet alibia e tij.
