Presidenti i Kamzës, Naim Qarri, dhe futbollistët e tij, janë goditur nga tifozët e skuadrës së Shënkollit të Lezhës, pas përfundimit të ndeshjes për Kategorinë e Parë.
Futbollistët e skuadrës së Shënkollit sulmuan ata të skuadrës mike, ndërsa disa tifozë u futën në fushë, duke goditur drejtuesit e skuadrës së Kamzës. Forcat e policisë nuk ndërhynë për të ndalur dhunën ndaj futbollistëve dhe presidentit të Kamzës. Ky i fundit është goditur me sende të forta nga disa tifozë që uzurpuan stadiumin.
Ndërkaq presidenti i futbollit të Shënkollit, Artan Djala, ka tentuar që të qetësojë tifozerinë për të mbrojtur futbollistët dhe presidentin e Kamzës.
Gjithashtu, ndaj përfaqësuesit e medias, janë kërcënuar nga persona të veçantë, me qëllim mospasqyrimin e asaj që ndodhi këtë të shtunë në Shënkoll.
Skuadra e Kamzës kryeson renditjen në grupin A, e ndjekur nga Beslidhja e Lezhës, dhe motivi i betejës në Shënkoll ishte ajo që Kamza të ndalej në këtë ndeshje, me qëllim që lezhjanët të kapërcenin kamzalinjtë, gjë që nuk është arritur, ndaj kjo ishte dhe si hakmarrje kundrejt skuadrës së Kamzës.
Ahmet Zani/Tirana Today
