Shpërthimi në depon afër portit të Bejrutit shkaktoi dëme të mëdha materiale, si dhe i mori jetën të paktën 150 personave.
Imazhet satelitore dhe ajrore tregojnë shtrirjen e dëmtimit fizik të qytetit. Si pasojë e shpërthimit kanë mbetur të plagosur më shumë se 6 mijë persona.
Ndërkohë, liderët ndërkombëtarë do të zhvillojnë një samit sot për të mbledhur ndihma për Bejrutin.
Konferenca virtuale, e organizuar nga Franca dhe Kombet e Bashkuara, pritet të fillojë në orën 14 sipas kohës lokale.
Presidenti i Shteteve të Bashkuara, Donald Trump, ka konfirmuar pjesëmarrjen e tij në këtë konferencë. Në këtë samit do të marrin pjesë edhe përfaqësues nga vendet anëtare të Bashkimit Evropian, Kina, Rusia, Egjipti, Jordania dhe Britania e Madhe. Ftesa për pjesëmarrje u është dërguar edhe shumë shteteve të tjera.
Zyrtarët kanë vlerësuar se shpërthimi i fuqishëm në një depo, ku ishin rreth dy mijë tonë nitrat të amonit, ka shkaktuar dëme në vlerë prej 15 miliardë dollarësh.
