Një qytetar turk nga Ankaraja, me origjinë shqiptare nga i ati, ka realizuar ëndrrën e jetës duke marrë pasaportën shqiptare në moshën 90-vjeçare. Kjo është historia e Fikret Tevfik Oktay, i ati i të cilit ishte ushtarak madhor në ushtrinë e perandorisë otomane e më pas në ushtrinë e Ataturkut me të cilin kishin miqësi personale.
Por, shkëputja nga Shqipëria erdhi për shkak të luftërave të zhvilluara në Ballkan e më pas atyre botërore. Më pas vetizolimi i Shqipërisë, i bëri të pamundura komunikimet me botën e jashtme.
Prej shumë vitesh, familja e Oktayt dhe të afërmit e tyre në Shqipëri të cilët janë familja e ish-deputetit Flamur Çelaj, nuk e harruan kurrë lidhjen familjare. Falë përpjekjeve të jashtëzakonshme nga të dyja anët, familja u ribashkua pas shumë vitesh, pasi kërkimet mes dy familjeve zgjaten për vite të tëra.
90-vjeçari ëndërronte të merrte pasaportën shqiptare, pasi donte që pjesën tjetër të jetës të jetonte si shqiptar. Pas marrjes së pasaportës shqiptare, familja Çelaj organizoi një festë tradicionale me motive shqiptare.
