Pikat e forta të Skënderbeut në Almati të Kazakistanit kanë qenë formacioni në fushë, skema dhe interpretimi taktik që iu bë ndeshjes. Trajneri Ilir Daja ka lënë të shtangur kundërshtarët përmes lëvizjeve të tij, dhe ndoshta të njëjtën gjë po planifikon edhe për ndeshjen e kthimit.
Nga ajo që duket nga seancat stërvitore ende nuk ka një pamje të qartë të formacionit, sepse edhe vetë trajneri e ka “shpërqendruar” ekipin në këto dy ditë të para. Dihet se Skënderbeu do të tentojë sërish të jetë zot i topit dhe trajneri kërkon të fitojë mesin e fushës. Nuk është çudi që përsëritet e njëjta skemë loje.
Për sa u përket lojtarëve, vihet re një balotazh më i madh tashmë mes Takut dhe Gavazajt. Duket se tiranasi do të ulet në stol, kurse kosovari do të hyjë në lojë që në minutën e parë. Megjithatë vendimi si përfundim i takon Dajës dhe ai me qëllim nuk e tregon se cilin lojtar do të zgjedhë.
Duket se pjesa tjetër e skuadrës është konfirmuar, dhe skema do të jetë 4-1-4-1. Por nuk do jetë befasi dhe ndryshimi i sulmit, me Vujoviçit që mund të zëvendësojë Xhejmsin edhe pse kjo është shumë pak e mundur.
